හිරු අවරට යන සැන්දෑ යාමේ

හිරු අවරට යන සැන්දෑ යාමේ

මතක පොතේ පිටු තුළට වැදී

සොඳුරු හැඟුම් උණු කඳුළු බිඳක් වී

නෙතගින් රූරා ගලා බසී

මුදුඟිල්ලට රන් පැහැයක් එක්කර

දෑඟිලි හුයකින් වෙලා තියා

මා හද අරණේ පිපුන පැතුම් මල්

වසන්තයට පෙර පරව ගියා

බොඳ කර රෑ දුටු සුන්දර සිහිනය

දුරු රටකට ඔබ වෙන්ව ගියා

මංගල යහනේ ආදර තිලකය

කඳුලින් පමණක් ඇඳී ගියා

නන්දා මාලිනී, පුෂ්ප කරුණාරත්න
විපුලසිරි කෝට්ටේගොඩ
පුෂ්ප කරුණාරත්න

අහසින් බසින් සඳ මඬලින් බසින්

අහසින් බසින් සඳ මඬලින් බසින්
මිනිසුන් මැද පුතුනේ මිහි මඬලේ ඉඳින්
කඳුළු සුසුම් විඳ මුවහත් වෙමින්
රට වෙනුවෙන් දැය වෙනුවෙන් නොසැලී ඉඳින්

සුපසන් නොවේ ලොව නුඹ මේ උපන්
නුවණින් වැඩී ලොව සුපසන් කරන්
විරුවන් ලෙසින් රුදු රණ බිම් මැදින්
නුඹගේ ගමන් මග ඉදිවේ බලන්

දෙවියන් නොවේ නිති අසලින් ඔබේ
දිරියෙන් ගතේ ඉ‍ටු දෙවියන් මැවේ
ජය පැන් වඩන් දහදිය වැල් වලින්
නුඹගේය ඒ නව ලොව පුංචී පුතුන්

නන්දා මාලිනී
?????
?????
ගීතය අසා රස විඳින්න

ඉපනැලිද දඟයි දෙනිපෙතද සැලෙයි

ඉපනැලිද දඟයි දෙනිපෙතද සැලෙයි
ගම් දොර සැමරුම් හමුවේ
මගෙ වෙහෙර නුඹයි අත නෙළුමක් වෙයි
පිදුමට පින් මදිද සිතෙයි

මේ ගමන දුරයි නුඹ තරු ලකුණයි
එළියෙන් දරුවන් සැනහෙයි
නුඹ මවක වගෙයි හිත බැතිබර වෙයි
ඉන් මගෙ දෑසම බොඳවෙයි

නොදැමුනු සුළඟේ ඇයි නා මල සසල කළේ
නා මලම තමා සැඩ සුළඟද නතර කළේ
සසරේ පසු පස එන තැවුලද උරුම වුණේ
එය තැවුලක් නොව එක මොහොතකි සසර මගේ

මගෙ වෙහෙර නුඹයි අත නෙළුමක් වෙයි
පිදුමට පින් මදිද සිතෙයි
නුඹ මවක වගෙයි සිත බැතිබර වෙයි
ඉන් මගෙ දෑසම බොඳවෙයි

නන්දා මාලිනී,සුනිල් එදිරිසිංහ,රෝහණ වීරසිංහ
බන්ධුල නනායක්කාරවසම්
රෝහණ වීරසිංහ
(අඹු දරුවෝ ටෙලි නා ට්‍යය)

පෙරදා මහ රෑ

පෙරදා මහ රෑ මා සිහිලැල් උර මඬලේ
මුහුණ හොවා ගෙන ලසොවින් වැළපුණ
ඔබේ විඩාපත් නෙතින් ගලා ගිය
කඳුලක කැලැලක් ඉතිරි වෙලා
පෙරදා මහ රෑ මා සිහිලැල් උර මඬලේ

උරහිස තැවරී වියළුණු කඳුලෙන්
ඔබගේ සුනරුත් පැතුමක ගිනි ඇත
සදා දැවෙන්නෙමි ඒ ගින්නෙන්

පෙරදා මහ රෑ මා සිහිලැල් උර මඬලේ

ඔබ හට පෙම් කළ යුගය නිමා කර
වෙන්වී යන්නට දවස පැමිණ ඇත
සමාව දෙන් මට සෙනෙහෙ සිතින්

පෙරදා මහ රෑ මා සිහිලැල් උර මඬලේ

නන්දා මාලිනී
සුනිල් ආරියරත්න
?????
ගීතය අසා රස විඳින්න

පූජාසනයේ ඔබ හිඳුවා

පූජාසනයේ ඔබ හිඳුවා
ඔබට පුදන මේ ලෝකයමයි හෙට
ඔබට එරෙහි වී නැගිටින්නේ
පූජාසනයේ ඔබ හිඳුවා

ඉසුරින් කිත් යසසින් බබළනදා
ඔබගේ බැණුමත් ගීයක් වේ
ඉසුරින් කිත් යසසින් පිරිහුණුදා
සිනාසුණත් එය වරදක් වේ

කිරියෙන් පැණියෙන් උතුරා යන කල
ලොව ඔබ පාමුල හඬා වැටේ
අත මිට හිඟ වී බෙල සුන් වන කල
ලොව ඔබ හිස මත කඩා වැටේ

නන්දා මාලිනී
සුනිල් ආරියරත්න
?????
 ගීතය අසා රස විඳින්න

පිපුණු මලේ රුව

පිපුණු මලේ රුව එ මල දනී දෝ
මලකි දුවේ උඹ හැඩ රුව බලන්නෙපා
නැති බැරි කම මුතු මාල හතක් වී
කඩුල්ල පැන එයි නුඹ අත කර ලන දා

කටු මැටි බිත්තිය හැඩ කර අඳිනා
රෑ හෙවනැල්ලෙන් හිස පීරන්නේ
නොතලන් හිත මා ආදර දියණියනේ
පාළු කණට නුඹෙ ඇස නොගැටෙන්නයි
වීදුරු කැඩපත බිම දැම්මේ

ළිඳේ අඩිය හිරු නොබලන පින්නේ
එබී ළිඳට නුඹ ඇයි හිනැහෙන්නේ
නොතලන් හිත මා ආදර දියණියනේ
පාළු කරට නුඹෙ ඇස නොගැටෙන්නයි
වීදුරු කැඩපත බිම දැම්මේ

නන්දා මාලිනී
ලූෂන් බුලත්සිංහල
පී. ඩන්ස්ටන් ද සිල්වා
 ගීතය අසා රස විඳින්න

මිරිවැඩි සඟලක්

මිරිවැඩි සඟලක් ඉල්ලා හැඬුවෙමි
පායුග නැති ඔබ දකින තුරා
කුංකුම අංජන ඉල්ලා හැඬුවෙමි
නෙත් යුග නැති ඔබ දකින තුරා

මාවත කටු අතු බොරළු මතක නැත
දෙපා රැඳුණු විට බුමුතුරුණේ
දොරකඩ යදියන් ඉඳුල් යදින සඳ
මැදුරේ දෙසවන් අගුළු වැටේ

සඳ කිඳුරන් ඇත සඳළු තලාවේ
රස මසවුළු වල සුවඳ පිරේ
ඒ රස සුවඳට දෑස අයාගෙන
බත් ඇට ඇහිඳිති පොඩි දරුවෝ

නන්දා මාලිනී
සුනිල් ආරියරත්න
නන්දා මාලිනී
 ගීතය අසා රස විඳින්න
 

කලා වැවෙන් ගත්

කලා වැවෙන් ගත් දිය දෝතක් සේ
වටී වටී ඔබ මටමැ වටී
බෝධියකින් වට බෝ කොලයක් සේ
අගී අගී ඔබ මටමැ අගී

කැටපත් පවුරින් ගිලිහුණු කවියක්
සොරකම් කරගත් සෙරක ලෙසින්
සඟවා ගෙන ඔබ සුරකිමි හද ගැබ
තනිවම කියවමි පදරුත් පසිඳමි

සමනළ සිරසින් විහිදුනු බුදු රැස්
සියැසින් දැක ගත් මෙහෙණක මෙන්
පරමානන්දය ලබමින් ඔබ ළඟ
සගමොක් සැපතෙහි අම රස වළඳමි

නන්දා මාලිනී
සුනිල් ආරියරත්න
ස්ටැන්ලි පීරිස් 
 ගීතය අසා රස විඳින්න
 

මලේ සුවඳ වාගේ

මලේ සුවඳ වාගේ මල මතම රැඳී
විලේ ජලය වාගේ විල තුළම රැඳී
සඳේ සදාතන ආදර සිසිල වැදී
අපේ ආදරේ පවතී සුවඳ දිදී

කල්ප කාල මං තල වල හිනා වෙවී
කල්ප කාල දුර ආවා වෙනස් නොවී
සෙනේ සිතින් ළඟ ඉඳගෙන කතා වෙවී
පැතූ පැතුම් මල් වරුසා හෙටත් වහී

හිතේ වෙලෙන ලෙන්ගතු කම කියා දිදී
පෑව සිනා දුටු දා සිට පෙමින් වෙලී
මහා මෙරක් සේ මා සිත නොහැර සිටී
නුඹෙන් තොරව ආදරයක් සිතනු බැරී

නන්දා මාලිනී
රඹුකන සිද්ධාර්ථ හිමි
නන්දා මාලිනී 
 ගීතය අසා රස විඳින්න