Friday, July 31, 2009

කුඩා ගමේ මද්දහනේ

කුඩා ගමේ මද්දහනේ අව් රස්නේ මෙමා
හුරේ කඳු පෙතේ දඩ මං දිගේ ගියා මෙමා
එවන් ගමන් මා නම් ගියෙ සෙනෙහස ගැන සිතා
නුඹේ කරට රිදී පොටක් පළඳන්නයි සුබා

මගේ පැළට නුඹ කැන්දං පැමිණි දොහේ එදා
මල් ගෝමර පිපුණු ලමැද වසා ගනිං කියා
මගේ අතින් දුන් සළුවෙන් ලමැද වසා ගියා
රිදී පොටක් කර ලන්නට වරම් නැතුව ගියා

ආල වඩන අකුරු පහේ තේරවිල්ල සකී
රෑට නිදන තනි පැදුරේ නැති සිහිනෙකි සකී
ආලෙ බිඳුණු දා කුමකට කඳුළු හෙලනු සකී
ආල වඩන යන තේරුම බෝසත් කම සකී

සුනිල් එදිරිසිංහ
ධර්මසිරි ගමගේ
?????

 ගීතය අසා රස විඳින්න

සැළලිහිණි කොවුල් හඬ

සැළලිහිණි කොවුල් හඬ රැව් දෙන්නා
මහ උයනක සිරි ඉතිරේ
මුවරැල අතරේ වග වළසුන්ගේ
රඟ මඬලකි මේ උයනේ

නීල කොබෝ රෑන ගිරා
පිල් විදහා රඟනා මොණරා
කට ඇද කිරළා සහ වලි කුකුළා
හොට දිග පිළිහුඬුවා
අප දැකලා බිය වැදිලා තරගෙට හඬ නැගුවා

කොළ දිවියා රළු කොටියා
කපටි රජා නම් ලද හිවලා
විසකුරු පොළඟා මිනි කන කිඹුලා
පොතුහැර කබරගොයා
රට පිඹුරා ළඟම නයා දරණ ගසා සිටියා

සී. ටී. ප්‍රනාන්දු, ලතා වල්පොල
සරත් විමලවීර
සී. ටී. ප්‍රනාන්දු

 ගීතය අසා රස විඳින්න

පෙම් රැහැනින් මා වෙලන්න

පෙම් රැහැනින් මා වෙලන්න
ඔබෙ සෙවණේ මට හිඳින්න
මම ආසයි ඔබත් සමග
මේ දිවි මග එකට යන්න

මගෙ ආදර විල් ජලයේ
නිල් මානෙල් මලක් වෙන්න
රේණු සලා මල් මුවරද
සිහිල් දියට එක් කරන්න

මම රැය නම් ඔබ පුරහඳ
සිත් අහසේ නැගී එන්න
සඳ සිහිලේ තැවුල් නිවා
රැයත් සමග ගෙවී යන්න

අජන්තා නාකන්දල
මහින්ද දිසානායක
එච්. එම්. ජයවර්ධන

 ගීතය අසා රස විඳින්න

Thursday, July 30, 2009

සුවඳ මල් රේණු පිස එන


සුවඳ මල් රේණු පිස එන
හාදු දෙන සිහිල් මද නල
නුඹට සමානා
කුරුළු තුඩු අගින් ගිලිහෙන
මිහිරි මියුරු ගී පදවැල
නුඹේ සිනාවා

සීත පිණි වතුල සඳවත
මොදු වී නිශා නුබ ගැබ
අඳුර මකාවා
නීල විල් දියේ උපදින
කොඳ මලක සුමුදු දළ පෙති
කොපුල් තලාවා

අරුණු දොරකඩින් නැග එන
උදා හිරු කිරණ හදවත
පුබුදු කරාවා
නොබා කරළියට දිව යන
හදට පණ පොවන උල්පත
නුඹේ සිනාවා

ඉමාන් පෙරේරා
යසනාත් ධම්මික බණ්ඩාර
නවරතන ගමගේ

ගීතය අසා රස විඳින්න

ආදර හැඟුම්

ආදර හැඟුම්
ආදර හැඟුම්
නුපුරුදුයි මට නුපුරුදුයි
ඒ හැඟුම්
ආදර හැඟුම්

කිති කවයි හද කිතිකවයි
ඒ හැඟුම්
ආදර හැඟුම්
ආදර හැඟුම්
ආදර හැඟුම්

සැඳෑ අදුරේ සැලෙන තරු එළි
මගේ හද තුළ කරයි විමසිලි
නැගෙන ගණඳුර වඩයි සිතුවිලි
මේ මඟුල් රෑ බිඳෙයි ඉවසිලි
ආදර හැඟුම්
ආදර හැඟුම්

කිමද ඔබ මල් කුමරියන්නේ
පෙති විදා සතුටින් නො ඉන්නේ
රහස නැතිවද මං නොදන්නේ
තුරුලෙ බමරුන් නොවෙද ඉන්නේ

ආදර හැඟුම්
ආදර හැඟුම්
ආදර හැඟුම්

අමරදේව
දයානන්ද ගුණවර්ධන
?????
(බක්මහ දීගේ චිත්‍රපටය)

 ගීතය අසා රස විඳින්න

බිංදු බිංදු මල් වැස්සේ

බිංදු බිංදු මල් වැස්සේ තෙමෙන්නට එපා
ගලින් ගලට පා තබමින් දුවන්නට එපා
ගල් මතුපිට ලිස්සනවා පය පැකිලේවී

ආල හැඟුම් මං හින්දා හිතෙන්නට එපා
දෑස තෙමා ලන දුක් ගිනි නැගෙන්නට එපා
දෙමාපියන් පිට ගමකින් මට බහ දේවී

නිල් ලන්දේ ගම් මැද්දේ ඉද්ද සමන් ඉපෙනවා
වෙල් බැද්දේ වගුරු පුරා කෙකටිය දළු දිලෙනවා
ගේ මැද්දේ බරණි පුරා වී අස්වනු පිරෙනවා
හිත මැද්දේ ලොකු අඩුවක් මගේ සතුට මකනවා

ආල හැඟුම් මං හින්දා.....

ගමෙන් ඈත සිදාදියේ ලොකු නුවරක් තියෙනවා
මාල වළලු අරුමෝසම් එහි ඇති බව කියනවා
දෙමාපියන් ගමෙන් පිටට මා දෙන්නට හදනවා
සිදාදියෙන් කුමාරයෙක් මා බලන්න වඩිනවා

බිංදු බිංදු මල් වැස්සේ.....
ආල හැඟුම් මං හින්දා.....

එඩ්වඩ් ජයකොඩි, නන්දා පතිරණ
?????
?????

 ගීතය අසා රස විඳින්න

Monday, July 27, 2009

සුවඳයි මල් සුවඳ සේ

සුවඳයි මල් සුවඳ සේ
මිහිරියි මී පැණි වගේ
ජීවත් වෙන්න ආසයි
හැමදාම හිමිදිරිය සේ

මල් පියලි විසිරෙයි වනේ
රොන් සුවඳ සුළඟට දැනේ
නැහැ පුඩුව සිනිඳුයි ඒ සුවඳ පුරුදුයි
මල් කැකුළු පූදින්න වාගේ

දිය කඩිති නිල් බර වුණේ
පොඩි තිත්ත පැටවුන්ටනේ
අල්ලන්න ආසයි උන් එක්ක යාළුයි
පීනන්න දිය කඩිති ගානේ

සමන්ත පෙරේරා, ඉන්දිකා උපමාලි
ලූෂන් බුලත්සිංහල
ප්‍රේමසිරි කේමදාස
(ඇසළ කළුවර ටෙලි නාට්‍යය)

ගීතය අසා රස විඳින්න

ඔබ රූ සිරියෙන්

ඔබ රූ සිරියෙන් මන්මත් වී මම
නොකෙලෙමි අනුවණ කම්
මුලා වුණේ ඔබ මුලා නොවිමි මම
මනමේ කුමාරියේ

ඔබ රූ සිරියෙන් ඔහු නැණ ගුණයෙන්
මාගේ විජිතය කෙලෙසී යනු දැක
සටන් වැදිමි මම සටන් වැදිමි මම
මනමේ කුමාරියේ

හැඩි දැඩි අප හට හුරු වූ වන ගැබ
අපගේ උරුමය රකිනා රිසියෙන්
සටන් වැදිමි මම සටන් වැදිමි මම
මනමේ කුමාරියේ

එඩ්වඩ් ජයකොඩි
ස්වර්ණ ශ්‍රී බණ්ඩාර
අමරදේව

 ගීතය අසා රස විඳින්න

උල ලේනෝ

පාළුව දෙවනත් කර නාඬන් උල ලේනෝ
කාටත් නපුරු දා තනිකම් ඇති වෙනවා
උල ලේනෝ... උල ලේනෝ...

හීත හුළං හිරිකඩයි කැලේ අපට උරුමේ
නුඹට පිහාටුයි මට පැල්පතයි තියෙන්නේ
උල ලේනෝ... උල ලේනෝ...

ඉහිරුණු කිරි කොතලෙට ඉකි බිඳලා පල නෑ
නුඹටත් එක්කයි මේ පැල් කවිය කියන්නේ
උල ලේනෝ... උල ලේනෝ...

සංසාරේ හැටි තමයි වියෝග ඇති වන්නේ
නිවනට ගියදා මේ හැම දුක නැති වන්නේ
උල ලේනෝ... උල ලේනෝ...

ගුණදාස කපුගේ
රං බණ්ඩා සෙනෙවිරත්න
සේන වීරසේකර

 ගීතය අසා රස විඳින්න

Friday, July 24, 2009

රත්න දීප ජන්ම භූමි

රත්නදීප ජන්ම භූමි ලංකා දීප විජය භූමි
මේ අපේ උදාර වූ මාතෘ භූමියයි
ආදි සිංහලේ වීර මී මුතුන් ලෙයින්
සාර වූ උදාර වූ මාතෘ භූමියයි

මාණික්‍ය සේ පොලෝ ගැබේ නිධාන වී
ඇත්තෙ ඒ අතීත දූ පුතුන්
ජාතියේ නාමයෙන් සංග්‍රාම භූමියේ
ජීවිතේ පුදා හෙලූ ලේ කඳයි

සින්ධූපමාන වැව් තලා මතින් ඇදී
පද්ම රේණුයෙන් සුගන්ධ වී
රන් කරල් නමා හමා සිත් ප්‍රබෝධයෙන් පුරා
එන්නෙ උන් හෙලූ ප්‍රාණ වායුවයි

ගංගා තරංග රාව දී රිදී වනින්
මල් පිපී කුලින් කුලේ හැපී
ගායනා කරන්නේ ආකාශයේ නැගී
වීරයින්ගෙ ඒ යශෝ ගීතයයි

අමරදේව
මහගමසේකර
අමරදේව

 ගීතය අසා රස විඳින්න

සිල් ගත් දෝතට

සිල් ගත් දෝතට පියුම් පිපෙනවා
පින් හිත පුර හඳ බුදුන් වඳිනවා
මිත්තණියේ නුඹ සිල් රෙදි පොරවා
පන්සල් ගිය හැටි හිතේ මැවෙනවා

බෝසත් සිරිතේ කතා කියා දී
බෝසත් ගති ගුණ පුරුදු කළා
බෝසත් දරුවන් රටකට බිහි කළ
මිත්තණියේ නුඹ නිවන් දකිනවා

බාලේ සිට අප තුරුලට අරගෙන
ආල වැඩූ අම්මා වාගේ
පෑ සෙනෙහස රන් රුවන් වටිනවා
මිත්තණියේ නුඹ නිවන් දකිනවා

එඩ්වඩ් ජයකොඩි
රඹුකන සිද්ධාර්ථ හිමි
රෝහණ වීරසිංහ

 ගීතය අසා රස විඳින්න

වන සිව්පාවුන් වැනි මිනිසුන් මැද

වන සිව්පාවුන් වැනි මිනිසුන් මැද
දෙවි දේවතාවුන් වැනි මිනිසුන් ඇත
ඒ දේවතාවන් දිව්‍යාංගනාවන්
මනු ලෝ තලයේ වාසනාවන්

වල්මත් වූවන් දැක මහ වන මැද
යා යුතු මාවත පෙන්වා
ඒ දෙස බලමින් සැනසෙන මිනිසුන්
ඉටු දෙවියන් ලොව සිටිනා

කඳුළු සලන්නන් කඳුළින් ගොඩ ගෙන
මුවගේ හසරැළි රඳවා
තුටු කඳුළින් නෙතු සරසන දෙවියන්
පුද දෙමු දෙවොලට කැඳවා

චන්ද්‍රලේඛා පෙරේරා
සුනිල් ආරියරත්න
රෝහණ වීරසිංහ
(රේඛා ටෙලි නාට්‍යය)

ගීතය අසා රස විඳින්න

Monday, July 20, 2009

මිණි මිණි මිණි පොද වැටිලා


මිණි මිණි මිණි පොද වැටිලා
වැව දොළ පිරෙනවා තෙතඟු
වැහි වතුරේ බිඳුවක්වත්
වුණොත් නේද අගේ යාළු

කුඹුරේ මා වී පැහිලා
කරල් කැපෙනවා තෙතඟු
වී කරලක ඇටයක්වත්
වුණොත් නේද අගේ යාළු

තුඩින් තුඩග රස ලිය ගී
රාව නැගෙනවා තෙතඟු
රස ගීයක පදයක්වත්
වුණොත් නේද අගේ යාළු

වැව පාමුල මහ සෑයේ
රන් කොත දිලෙනවා තෙතඟු
සෑයේ වැලි කැටයක්වත්
වුණොත් නේද අගේ යාළු

සේනානායක වෙරලියද්ද
මහින්ද දිසානයක
ගුණදාස කපුගේ
(මියුරුසර වසන්තයේ ගී-1998)

පින්න මලේ සුද

පින්න මලේ සුද ඇන්න ගිහින්වද
මුහුණ පුරා පෙම පිරිලා
ඉන්න එපා නුඹ හැන්දෑකරේ දොර
කන්ද කපා හඳ ගෙට එන්නා

දුන්න වගේ නැමි බණ්ඩි කුරක්කන්
අන්න බලාපන් අත වනතේ
මන්ද නඟේ නුඹ යන්නෙ ගමෙන් පිට
ගං ගොඩ වෙල් එළි පාළු වෙතේ

ඉන්නෙ මොකෝ වැට ඉන්න වගේ නුඹ
එන්නෙ අළුත් අවුරුදු කාලේ
ගන්න එපා පර දේස සිරිත් නෙක
මේක අපේ සිංහල දේසේ

එඩ්වඩ් ජයකොඩි
අමරසේන කංකානම්ගේ
රෝහණ වීරසිංහ

 ගීතය අසා රස විඳින්න

අව්වට වැස්සට හුරු මිනිසුන්නේ

ව්වට වැස්සට හුරු මිනිසුන්නේ
දෑතේ විරියෙනි රටවල් නැගුනේ
ඒ මිනිසුන්ගේ මළගම වෙනුවෙන්
මොන රජ මැදුරෙද සුදු කොඩි නැගුනේ

දා ගැබ් මහ වැව් කලා නිකේතන
නුඹලා දෑතිනි මිහි මත මැවුනේ
ඒ නුඹලාටයි දූ දරුවන්ටයි
මොන රජ මැදුරෙද දොරටුව හැරුනේ

රජ සැප විඳිනට රජ දරුවන් හට
නුඹලා දෑතිනි මන්දිර මැවුනේ
ඒ නුඹලාගේ දුක දැක ගන්නට
මොන රජ දරුවද පැලකට වැඩියේ

ටී. එම්. ජයරත්න
රඹුකන සිද්ධාර්ථ හිමි
ප්‍රේමසිරි කේමදාස

 ගීතය අසා රස විඳින්න

Sunday, July 19, 2009

මේ තරම් සියුමැලිද කළු ගල්

මේ තරම් සියුමැලිද කළු ගල්
හිතන්නටවත් බැරි නිසා
මම ගියා අවුකන බුදුන්ටත්
දෑස් දුන් මිනිසා සොයා
දෑස් දුන් මිනිසා සොයා

කලා වැව ළඟ ඉළුක් හෙවණක
මැටි පිලක පැදුරක් එලා
රිදුම් පිරිමදිමින් බලයි ඔහු
මැරෙන ඉපදෙන රළ දිහා
මැරෙන ඉපදෙන රළ දිහා

ඉසුරුමුණියේ නුඹ තැනූ
පෙම්බරිය කොතැනද කියා
මා ඇසූ විට හිනැහුණා ඔහු
තවම තනිකඩ යැයි කියා
තවම තනිකඩ යැයි කියා

සුනිල් එදිරිසිංහ
රජී
වෙල්ගම
දර්ශන රුවන් දිසානයක

මේ අහස මේ වගෙම

මේ අහස මේ වගෙම ගණ නිල් සළුවකින් එතී
සැරසුණු එක් වසන්තයක හමු වුණා අපී
ගහ කොළ ද මල් පිපී සැරසී සුළඟෙ දඟ වෙවී
ඔබයි මමයි එක් කළ හැටි සිහිනයක් මෙනී

ඒ අතීතයේ ඔබ මිමිණූ වදන් යළි යළී
රාව නගන විට දෙනුවන් බොඳව යයි සැලී
අතීතයේ මතක සුවඳ සුසුම් හා වෙලී
නටඹුන් සෙනෙහසේ නුවර ගොස් ලැගුම් ගනී

ඒ අහසමයි යළිත් අද නිල් සළුවකින් එතී
වසන්තයට මල් පිපෙනව සුළඟෙ දඟ වෙවී
වසත් සියොත් කැල ගැයුවද ප්‍රේමයේ කවී
අපේ හදේ වස්සානය තවම නිම නැතී

කරුණාරත්න දිවුල්ගනේ
සුනේත්‍රා අළුත්දුන්න
නාලක සම්පත් වීරසිංහ,කරුණාරත්න දිවුල්ගනේ


කිරි ඉද්ද ගහට සුද අරගෙන

කිරි ඉද්ද ගහට සුද අරගෙන සඳ එන දවසට
සිහිනයක් වෙලා ඔබ හිඳින්න මගෙ ඇසිපිය යට
ඒ ඇති මැණිකේ මට ඒ ඇති මැණිකේ මට
සිහිනයක් ලෙසින් ගිලිහී යන අපෙ හෙට දවසට

අප නැතැයි කියා වැරුවද ගස් වැල් මල් සම්පත
ගඟ නතර වුණාදැයි කියන්න මුවදොර නොම දැක
පසු තැවෙන අපේ සිත් තනි කර ලොව දුර ගමනක

මේ නුවර එදා වගෙමයි අප පෙමින් ඇවිද ගිය
මුහුණුවර දන්න ගස් වැල් අප නැතත් පඳුරු ලන
ජීවිතය කියා දී එකිනෙක පරමල් හිනැහෙන

ක්‍රිෂාන්ත එරන්දක
රවි සිරිවර්ධන
රෝහණ වීරසිංහ

ගීතය අසා රස විඳින්න 
 

Sunday, July 12, 2009

සබඳ අපි කඳු නොවෙමු

සබඳ අපි කඳු නොවෙමු
උනුන් පරයා නැගෙන
සුනිල දිය දහර වෙමු
එකම ගඟකට වැටෙන

වියරු ගිනි දැල් නොවෙමු වනය අවුලා තබන
සිහිල දෙන වැස්ස වෙමු දැවෙන කැලයට වසින

නපුරු හීනය නොවෙමු ළමුන් නිදි සුව බිඳින
සොඳුරු අඬහැරය වෙමු දනන් නින්දෙන් මුදන

ගුණදාස කපුගේ
දර්ශන මේදිස්
ගුණදාස කපුගේ

ගීතය අසා රස විඳින්න

සොඳුර නුඹ ලිහිණියක

සොඳුර නුඹ ලිහිණියක රැයේ අඳුරට හඬන
මම ද ලිහිණියකු වෙමි කැඩුණු තටු පිරිමදින

අහිංසක අප දෙදෙන තටු කඩා මේ ලෙසින
සිඳී ගිය ගඟ දෑල හැර දැමූයේ කවුද
සඳට දොස් නොකියන්න සඳ කුමක් කරන්නද
බාල වයසින් මැරුණ ප්‍රේමයකි තරු එළිය

කටුක දුක් විරහ මැද අතරමං වී ගියද
අපි තවම පෙම් කරමු අපේ ජීවිත වලට
කියාදෙමු පියඹන්ට අපි අපේ පැටවුන්ට
නිදහසේ තටු ලැබුණ කුරුල්ලන් වී දිනක

ගුණදාස කපුගේ
රත්න ශ්‍රී විජේසිංහ
ගුණදාස කපුගේ

 ගීතය අසා රස විඳින්න

Friday, July 3, 2009

සඳ ද වසා හිරු ද වසා

සඳ ද වසා හිරු ද වසා තරු ද පිස දමා
ඇමද අහස සයුරු දියෙන් ඇඟිළි තුඩු තෙමා
ලියමි අකුරු සතරක් එහි මගේ සුරතින්
ඔබ ආ කල කියවමි එය බල බලා නෙතින්
ආදරේ..... ආදරේ.....

ගඟ සමුදුර තුරුලිය ගොමු කඳු ඉම හමුවේ
අග හිඟයක් නැති විලසින් අතු දළු නැමුවේ
මග පියවර සළකුණු දිග පෙර මග හමුවේ
දුටුවා සිරි වැසි දියරෙන් මිහිකත තෙමුවේ

ලය සරැලිව පවනට මුදු ගී රස මුමුණයි
රැය සඳ වත තරු මුතු කැට ගෙල වට අමුණයි
ඔබ පිළිබඳ මගෙ මතකය හෙමිහිට පිපුණයි
මී මැසි තුඩ තුඩ ගා ඒ රස මට දැනුනයි

නිර්මලා රණතුංග
ප්‍රේමකීර්ති ද අල්විස්
විජේරත්න රණතුංග

ගීතය අසා රස විඳින්න

සුදු ඇඳගෙන සඳ ඇවිදින්

සුදු ඇඳගෙන සඳ ඇවිදින් දුර කඳු මුදුනට
රිදවුණු සිත ගෙනයයි කඳුලැලි ගං ඉවුරට
ඔබ ආ හැටි සමු ගන්නට අවසන් සැන්දෑවක
ඒ ගං ඉවුරට

බාධක බිඳ නුඹ ජය ගන්නට බැරි වුණි මට
ඇයිදැයි දොස් පවරන සඳ සිත
නුඹෙ වරද ද මගෙ වරද ද
එය මා දන්නේ නැත

නුඹ මා ලොව කළුවර කර පැන ගිය පලියට
කෙලෙසක දොස් පවරමි නුඹ් හට
කිසිකෙනෙකු නොදුන් ආදරයක්
නුඹ මට දුන් කොට

කරුණාරත්න දිවුල්ගනේ
යමුනා මාලනී පෙරේරා
?????

 ගීතය අසා රස විඳින්න

පාත ඉඳන් අපි ආවේ

පාත ඉඳන් අපි ආවේ
නා මල් පූජා කරන්න
දළදා හාමුදුරුවනේ
පාත මාලයට වඩින්න

හීල් හෙවණෙ හිඳගෙන බෑ
හේන් කුඹුරු වැඩ කරන්න
ඇඟ පත කළු වුණත් අපේ
කිළි කුණු නැති හිත බලන්න
දළදා හාමුදුරුවනේ
පාත මාලයට වඩින්න

මූදු ගියා ලෙලි තැළුවා
පිළි ගඳින් බෑ මිදෙන්න
ඒත් අපේ මල් සුවඳයි
එපා බාර නොගෙන ඉන්න
දළදා හාමුදුරුවනේ
පාත මාලයට වඩින්න

වික්ටර් රත්නායක
රත්න ශ්‍රී විජේසිංහ
වික්ටර් රත්නායක

ගීතය අසා රස විඳින්න